1 تعالـي غربلـي قلـب ٍ تبعـثـر داخــل آهـاتـك
تحمّـل كــل شــيّ الاّ ثـوانـي غيبـتـك عـنّـي

2 تعالـي ناظـري عيـن ٍ بكـت باحسـاس عبراتـك
تــذلّ لْعيـنـك عـيـون ٍ تمـنّـى نـظـرة ٍ مـنّـي

3 تـرى محـد ٍ بهـا الدنيـا تحمّـل هــمّ ويـلاتـك
ولكـنّـي أنــا اتحـمّـل ولا اتمـنّـن ب( لكـنّـي )

4 أنـا رجّـال بـك هايـم أحـب تــراب خطـواتـك
كثـر مـا احبـك انقهـرن بنـات الـنـاس وعافـنّـي

5 أحبـك كثـر مـا إنتـي كرهتـي كـثـرة شتـاتـك
كثـر مـا انتـي مواويـل التعاسـة صـرتـي تْغـنّـي

6 أحبك كثـر مـا قلتـي : ( أحبـك مـوت ) بسكاتـك
أحبـك كـثـر مــا ودّك أصـيـر بـيـوم متهـنّـي

7 أحبك كثـر مـا ( غابـت ) عـن الأنظـار بسماتـك
أحبـك كثـر مـا ( صابـت ) خفوقـي هْمـوم تطعنّـي

8 أحبك كثر ما ( غـار الشهـد ) مـن حالـي شْفاتـك
أحبـك كثـر مـا ( زار النـكـد ) قلـبـي ويسكـنّـي

9 أحبك كثر مـا ( نلتـي ) بْحـلاك اسمـى علاماتـك
أحبـك كثـر مـا ( قلتـي ) : هُمومـي ليـه يتلنّـي ؟

10 أحبك كثـر مـا ( حظـك ) نسـاك بيـوم أو فاتـك
أحبك كثـر مـا ( خظـك ) خبـر عنـي وصـل منّـي

11 أنا اكثر شخص بالدنيا يـذوق الويـل وحْياتـك ـ
حياتـي كلهـا صـارت مـجـرّد شـخـص متمـنّـي

12 حسافة ما تحقـق لـي عـدا انّـي أصبـح مْناتـك
قهـر واكبـر قـهـر إنّ الأمـانـي خيّـبـت ظـنّـي

13 تمنّيـت انّـي آشوفـك ألاعـب زيـن خصـلاتـك
أبعّـدهـا .. واقرّبـهـا .. واخرّبـهـا أنــا بسـنّـي

14 تقوليـن بدلـع : شعْراتـي احسـن ولاّ شعْراتـك ؟
أقـول : ان كانهـا أحسـن .. لعنْـهـا الله ويلعـنّـي

15 تقولي لي : ترى أزعل ! أقول اشـري أنـا رضاتـك
أبيـع الكـون لجـل انتـي تكونـي راضـيـة عـنّـي

16 تقولين استحـي منّـك .. أضيـع بعـذب كلماتـك
ألا يـا لعنـبـو حـيّـك تــرى همـسـك يجنّـنّـي

17 دخيلـك إرفـق بقلـب ٍ تولّـع فـي جمـر ذاتــك
كثر ما صـرت اهـذري بـك حـروف الحـب ملّنّـي !!

18 قسـم بالله لـو تبعـد تـرى تنـدم علـى سْواتـك
أقـوم ادعـي إلـه الكـون لا مـن مـت .. تدفنّـي !!

19 أنا مابـي أشـوف النـاس لـو عافتنـي نظراتـك
تـرى نظـرات مـن حولـي قهـر واحـزان تطعـنّـي

20 تمنيـت انـي آضمـك أبسمـع عــذب ونّـاتـك
أبـي فـي صـدرك الطاهـر ثوانـي الحـظ يرمـنّـي

21 ( أبلعب ) في ربى نحرك .. أبرقـى فـوق لشْفاتـك
أبــي أسـتـدرج اللـولـو واخلّـيـهـن يعـظّـنّـي

22 ( أبشرب ) من شهد ثغرك .. واناظر كيـف ميلاتـك
أبـي مـع كـل ميـلاتـك عيـونـك مــا يشوفـنّـي

23 ( أبقلب ) لونـك لأزرق .. واحـسّ برجـف ديّاتـك
أببعـد عـنْـك وانفـاسـك أبيـهـا تقـتـرب مـنّـي

24 ( أبكتب ) في ( حبر ) رمشك نهاية ( بحر ) مأساتك
أببـدى فـرحـة سنـيـن ٍ مـحـال بـيـوم ينهـنّـي

25 قبـل عاميـن انـا شفتـك .. سجنتينـي بنظراتـك
ولـيـن الحـيـن بعيـونـك ولا بيـهـن يخـلّـنّـي

26 أبد ما نْسى غضب زولك .. أبد ما نْسـى اندفاعاتـك
سمعـت خْطـاك تتخايـل : بنـات ومــا يهمّـنّـي !

27 أنـا مـن كثـر إعجابـي بغيـت آكلّـم اخـواتـك
قهر وشلـون ( حوريـة ) تجـي وتكلّـم ( الجنّـي ) !!

28 قهر وشلون انـا ووجهـي أبوقـف مثـل وقفاتـك
أنا اللي وجهـي ( الأشهـب ) أجـي وآكلمـك عنّـي !

29 تـرى عيـب ٍ علـى عينـي تناظـر مثـل طلاّتـك
أناظر أبيض ٍ ناصع وانا ( حنطـي ) علـى ( بنّـي ) !!

30 أنـا كنّـي ( بدائـي ) تـاه كيـف تْـدور آلاتــك
أخاف ابْعـد أنـا افقدهـا .. واخـاف اقْـرب يضرّنّـي

31 بعـد جلسـة أنـا وقلبـي تباعـدنـا مسافـاتـك
نبـي كـلّ ٍ علـى قـدره يــروح الـيـوم متعـنّـي

32 عقـب هـذا القـرار الصعـب شدّتنـي الْتفاتـاتـك
أحـس عيونـك النجـلا بـعـد عـمـري ينـادنّـي

33 وقفت اسأل خفوقي : يـا خفوقـي فرصـة وْجاتـك
تبينا نْروح ؟ قـال : اسـرع تـرى النظـرات صابنّـي

34 مشيـت ومـا منعنـي عنْـك لوحاتـك واشاراتـك
حواجـز مـن بشـر حولـك رفضْـت بْحـزم يْـردّنّـي

35 وصلت وقلـت : لعيونـك , وممنونـك , وهيباتـك
أنـا داخـل علـى الله ثـمْ علـى عْيـونـك يراعـنّـي

36 مشيتـي مـا تكلمتـي .. مسكْـت بْلطـف ديّاتـك
أنـا داخـل علـى الله ثـمْ عـلـى يْديـنـك يطقّـنّـي

37 مشيتـي مـا تكلمتـي .. وقفْـت بْـدرب خطواتـك
أنـا داخـل علـى الله ثـمْ علـى رجولـك يدوسـنّـي

38 مشيتـي مـا تكلمتـي .. طلبـت أسمـع عباراتـك
أنـا داخـل علـى الله ثـمْ علـى حْـروفـك يسبّـنّـي

39 عطيتينـي الأمـان اللـي وصلنـي بابتسامـاتـك
نطقتي ما سمعتك زين قلتي : ( إن .. تلـي .. منّـي ) !

40 أنا ( مْفَهّي ) ولا أدري وش اللـي وسْـط كلماتـك
أثاريهـا ( انتظـر منّـي تليفـون ) وْضحَـك سـنّـي

41 وصلت البيـت متلخبـط .. ذكـرت عْلـوّ راياتـك
أقـول الله يالدنـيـا .. أخـيـراً صـرتـي تْحـنّـي !

42 ( سبع من شهر ذي الحجة ) بـدت أحلـى رواياتـك
بعَدهـا بيـوم ياعمـري ( تليفونـي ) بــدى يْـرنّـي

43 ( ترن ) ثمّ ٍ ( ترن ) ويلـي ألا يـا محلـى رنّاتـك
تدودهـت ونشـف ريقـي .. زهقتـي وانتـي تْـرنّـي

44 بدت لي ( أربـع وأربـع وسـت ) وْباقـي نمراتـك
ألو .. قلتي لي : غلطانة .. صرخْت : ارجـوك إستنّـي

45 أبد مانتـي بغلطانـة .. أنـا المجنـون فـي ذاتـك
أنـا المجنـون فـي كلـك .. رجيتـك مثلـي انجنّـي !

46 أنـا ذاك الخبـل والدلـخ يـوم ٍ شـاف نظـراتـك
أنـا المعتـوه والسدمـه هبـيـل ٍ مختـبـص ظـنّـي

47 أنا الظامـي ورى زولـك أبـي مـن مـيّ واحاتـك
دخيـلـك لا تخلّـيـن الصـحـاري الـيـوم تدفـنّـي

48 أنا الهايم علـى وجهـه .. تخبّـط تحـت رمياتـك
سهـم يخطينـي وسهـم ٍ علـى السرجـوف يطعـنّـي

49 أنا ( المنثور ) في زخمك .. أنا ( المبذور ) بشْتاتـك
أنـا المرحـوم لـو مـتّـي لأن كـنّـك أنــا كـنّـي

50 أنا ( المسرور ) لو تحكي .. أنا ( المكسور ) بسْكاتك
أنـا اللـي حنّـت اقـداري وْعليـك الـيـوم جابـنّـي

51 أنا ( المغمور ) من دونك .. أنا ( المشهور ) بابياتك
لو اكتب عنْـك يطلبنـي ( أبـو نـورة ) يبـي يْغنّـي !

52 أنا ( المأسور ) برْموشك .. أنـا مسحـور نظراتـك
أنـا اللـي أطلبـك إنـتـي واحاسيـسـك تـزورنّـي

53 أنا ( المأمور ) والمنهي .. أنا اللي رهـن اشاراتـك
تبينـي أذبـح العالـم ؟ بسيطـة .. إنـتـي اتمـنّـي

54 همستي مدري وش قلتي .. درر , بلّـور همساتـك
أظنّك قلتي ( تسلم لـي ) .. أظـن ومـا اجـزم بظنّـي

55 لأنـي وقتهـا كنّـي سـكَـرت بْلـحْـن آهـاتـك
ترى ( آهك ) كمـا ( الغـارة ) علـى أسماعـي تْشنّـي

56 وعدتينـي وْحلفتـي لــي تعيـديـن اتصـالاتـك
وانـا مـن فرحتـي أشهـق واهنّـي قـلـب ٍ يْـونّـي

57 ختمتي بْقولتك ( بايات ) انا افـدى كـل ( باياتـك )
وانا مالت على وجهي .. حـروف ( البـاي ) يجفنّـي !

58 عجزت آقولها مثلك .. مـن اللـي يسـوّي سْواتـك
حروفـك تنصهـر منّـك .. عليهـا إرفـقـي وْحـنّـي

59 بكـت سماعـة الهاتـف عقـب أحلـى سلامـاتـك
قعـدت آبوسهـا كنّـي أبــوس شـفـاه باسـنّـي !!

60 أواسيهـا وانــا مـحـد ٍ يواسيـنـي بغيبـاتـك
أسلّيهـا وانـا اللـي مــا خَـبـر أشـيـا يسلّـنّـي

61 رغم حزني .. أنـا الأسعـد إذا اتذكّـرت جيّاتـك
أقـول لْدنيتـي : ( دِنّـي .. أهـا لا يكثـر وْدِنّــي )

62 أنـا يـا دنيتـي مارْضـى تذلّيـنـي بمأسـاتـك
أنا هالحين من قدّي .. وعـود ٍ مـن ( وفـا ) جَنّـي

63 أنـا يـا دنيتـي أرفـض حـيـاة ٍ باحتمـالاتـك
أعيش ارجي أنا عطفـك !! حشـا .. ماطيقـك تْمنّـي

64 أنـا مانـي صغيـر السـن تلهينـي حكايـاتـك
أنـا فاهـم ألاعيبـك .. فهمتـه مـن صغـر سـنّـي

65 حشرتيني وسَـط ( دهليـز ) وسدّيتـي ممرّاتـك
قهرتك قلت : انا طالع .. سكتّي , قلـت لـك : فِنّـي ؟

66 طلعـت بكـل ( إصـرار ) وتمشّيـت بْمتاهاتـك
إذا انتي ريح انا ( إعصار ) غاشـم .. إحـذري منّـي

67 أنـا يـا دنيتـي ذقـت البـلاوي مـن مضراتـك
أبد ما اذكر نفعتينـي .. وش اللـي واصلـك عنّـي ؟

68 حرمتينـي مـن الوالـد .. رميتيـه بْمـداراتـك
وانـا تـوّي ولـد ستـة .. تركتـي أمــي تْـونّـي

69 تركتينـي أنـا واخـت ٍ صغيـرة فـي مجرّاتـك
ورانــا أمّ ٍ تْـصـارع جـيـوش ٍ مـنْـك يلفـنّـي

70 حرمتيني من اللـي يْقـول : أعمامـك وعماتـك
حرمتينـي مـن اللـي عـن خوالـي جـا يطمـنّـي

71 عزلتينـي عـن العالـم .. سقيتينـي مـراراتـك
فرضْـتـي يتـمـي وفـقـري هقيتيـهـن يذلّـنّـي

72 تركتيني بليّا قلـب .. انـا ماخْشـى اجتياحاتـك
أسـودك يـوم شافنّـي غصُـب يالدنـيـا هابـنّـي

73 واذا انتي من بعد عشقي فتحتي بِيـض صفحاتـك
تـرى مـا عـاد يعنينـي إذا الصفـحـات يطـونّـي

74 تبيني عن ( وفا ) أبْعـد ؟ كـذا دايـم سخافاتـك
أنـا مـاتْـرك ( وفــا ) إلاّ إذا الـديـدان ذاقـنّـي

75 وفا .. يا ( شهرة ٍ ) مدري متى أوصـل نهاياتـك
وفا .. يا ( مهـرة ٍ ) حـازت صفـات ٍ حيـل تفتنّـي

76 وفا يا حبي العـذري .. جزمـت بْصـدق نيّاتـك
سقـا اللهْ ليلـة ٍ فيهـا عِـيـون الـحـب يسقـنّـي

77 أنا موجود في بالك .. ترانـي ( مختـرق ) ذاتـك
برامـج يحمـن الخافـق تـرى خـافـن يـردّنّـي !

78 أنا ماني أبـد طالـع .. ولا همّتنـي ( فُرماتـك )
أنا ( الرستارت ) شايلها .. وفـا لا تزعلـي منّـي !!

79 أنا ( الهاردسك ) يا عمري أنا احسن كل ( راماتك )
أنـا ( خلفيّـة الشاشـة ) عِيونـك بـس يشوفنّـي !

80 وفـا ليتـك تشوفينـي شَسـوّي وقـت غيباتـك
أغنّي باسمك وأضحـك .. أحـد يضحـك إذا يغنّـي !!

81 كثر مـا اشتـاق لـك أدري واحـسّ بْإشتياقاتـك
أحاسيسـي لأحاسيـسـك كثـيـر احـيـان دلّـنّـي

82 على فـراش المنـام ارسـل سلاماتـي لحاراتـك
واصيـح ارجـي مـن احـلام الليالـي لـك يودّنّـي

83 ألا يالله يـــاربّ ٍ تعـلّـيـت بـسـمـاواتـك
طللبتـك يالولـي تبـعِـد هُـمـوم ٍ حـيـل أذّنّــي

84 أبـي شملـي مـع الغاليـن يتْجمّـع بمرضاتـك
أبيها .. وْغيرها ما ظـنْ يجـي فـي يـوم يعننّـي !

85 وفـا تكفيـن دعواتـك أبيهـا بْكـل سجـداتـك
عسـى دعواتـك مْـزون ٍ تـهـلّ عْـلـوم يـرونّـي

86 أبي تدعيـن رب العـرش يقصّـر لـي مسافاتـك
أبمشـي فـي وسَـط درب ٍ بـه الريـحـان يفتـنّـي

87 ( أعوّض ) عينك ( النجلا ) شنيع وقشْر شوفاتـك
أخلّـي رْموشـك ( الكسـلا ) بْكسلهـن دوم يرمنّـي

88 ( أروّض ) رجلك اليمنى مـع اليسـرى بمشياتـك
واخلّيـهـن عـلـى دربــي .. يدلّـنّـي ويتلّـنّـي

89 ( أبدّل ) نـارك بجنـة .. واهيـم بريـح جناتـك
أقوم وألتقـي وجهـك واردّد : ( مـن أهـمّ منّـي ؟ )

90 ( أعدّل ) برمجة وقتك .. وارتّب وقـت ساعاتـك
أبـي منهـا أنـا ( أربـعْ وعشريـن ٍ ) .. يكفنّـي !

91 أبـي جْروحـك يلومنّـي إذا خيّـبـت هقـواتـك
وانـا اتْحـداك واتْحـدى جروحـك لـو يلومـنّـي !

92 لأنّ المـوت أحسـن لـي إذا سبّبـت لوعـاتـك
أنا وش عيشتـي لامـن عليـك اصبحـت متجنّـي ؟

93 أبي لامـن جمعنـا الـرب تقضـي كـل عبراتـك
أبـد مانـي ولـد رجّـال اذا جـا يــوم يشكـنّـي

94 أبي من قلبك ( المغرم ) يـذوق رْ كـود أزماتـك
أبيـه يحـس بالراحـة .. عقـب مـا كـان متعنّـي

95 أبي من ليلك ( الأظلـم ) يطفّـي نـور شمعاتـك
أبيه يحس وش معنى ( الأرق ) فـي عيـن ٍ تْونّـي !

96 أبي من صبحك ( الغابر ) يشوف شلـون طلاّتـك
أبيـه يحـس فـي طعمـك عقـب ماليلـك يمِـنّـي

97 أبي من عقلك ( الصابر ) يجـي يستنتـج اثباتـك
قدرتي تملكيـن العقـل ونفـس الوقـت .. تنجنّـي !!

98 وفا .. هاويك انا لْذاتـك .. ولـو تـزداد شيباتـك
واذا تــزداد شيبـاتـك .. تظنّيـهـن يصـدّنّـي ؟!!

99 وفا .. عيّا القلم يوْقـف واشوفـه طـوّل ابياتـك
لو اكتب عنْـك انـا ( مليـون ) بيـت ٍ مـا يكفنّـي !

100 وصلت الحين ( للميّة ) .. أبنهـي كـل آهاتـك
واذا في عشقي تْشكّي .. أمانه ابعدي عني